Ek baar hum masjid me aap ﷺ ke sath baithe huwe the, itne me ek shaks oont par sawar hokar aya aur oont ko masjid me baitha kar bandh diya. Fir puchne laga,' (bhaio) tum mese Muhammad ﷺ kon hai hai?
Aap ﷺ logo me is waqt takiya lagaye baithe huwe the, humne kaha,' Hazrat Muhammad ﷺ ye safed rang wale buzurg hai jo takiya lagaye huwe tashreef Farma hai."
Tab wo shaks Aap ﷺ se mukhatib huwa aur kaha," Aye Abdul muttalib ke farzand!'
Aap ﷺ ne farmaya: kaho main tumhari baat sun raha hun.
Wo bola: main aap se kuch deeni baatein daryaft karna chahta hun, aur Zara sakhti se bhi puchhunga, to aap apne dil me bura na maniyega,"
Aap ﷺ ne farmaya: nahi' jo tumhara dil chahe puchho.
Tab usne kaha: " main aap ko aap ke rub aur agle logo ke rub tabarak wa'taala ki kasam dekar puchhta hun, "kya aap ﷺ ko Allah ne dunia ke sab logo ki taraf Rasool bana kar bheja hai?
Aap ﷺ ne farmaya: Han, ya mere Allah.
Fir usne puchha: main aap ﷺ ko Allah ki kasam deta hun, kya Allah ne aap ko raat din me paanch namaze padhne ka Huqum farmaya hai?
Aap ﷺ ne farmaya: Han, ya mere Allah.
Fir kehne laga: main aap ﷺ ko Allah ki kasam dekar puchhta hun, kya Allah ne aap ko ye huqum diya hai ke saal bhar me is mahine Ramzan ke roze rakho?
Aap ﷺ ne farmaya: Han, ya mere Allah.
Fir kehne laga: main aap ﷺ ko Allah ki kasam dekar puchhta hun, kya Allah ne aap ko ye huqum diya hai ke jo hum mese maal-daar log hai, unse zakaat wasool karke hamare mohtajo me baant diya karen?
Aap ﷺ ne farmaya: Han, ya mere Allah.
Tab wo kehne laga: jo huqum Aap ﷺ Allah ke paas se laye hai, main un par imaan lata, aur main apni qom ke logo ka jo yahan nahi aye hai, bheja huwa (tehqeeq-e-Haal) ke liye aya hun. Mera naam Dhamam bin sa'labah hai, main bani sa'ad bin bkr ke khandan se hun.
(Sahih Bukhari 63)
Ye hadees islami Aqaid aur ibadat ki buniyadi ahmiyat ko wazeh karti hai.
(1)
Nabi-e-Kareem ﷺ ko Baisat Aur Risalat:
main aap ko aap ke rub aur agle logo ke rub tabarak wa'taala ki kasam dekar puchhta hun, "kya aap ﷺ ko Allah ne dunia ke sab logo ki taraf Rasool bana kar bheja hai?
Aap ﷺ ne farmaya: Han, ya mere Allah.
Allah ﷻ ne farmaya: aur hum ne aap ko tamam logo ke liye khush-khabri dene wala aur dar sunane wala bana kar bheja hai, lekin aksar log nahi jante.
(Surah saba ayat 28)
Allah ﷻ ne farmaya: keh dijiye: aye logo! Beshak main tum sabki taraf Allah ka Rasool hun.
(Surah Al-A‘raf 158)
Ye ayat is hadees ki tasdeek karti hai ke Nabi-e-Kareem ﷺ dunia ke tamam insano ke liye nabi bana kar bheje gaye hai.
(2)
Namaz ki Farziyat:
kya Allah ne aap ko raat din me paanch namaze padhne ka Huqum farmaya hai?
Aap ﷺ ne farmaya: Han, ya mere Allah.
Allah ﷻ ne farmaya: beshak namaz momino par muqarrar waqto me farz ki gai hai.
(Surah Nisa 103)
Nabi-e-Kareem ﷺ ne farmaya: panch namaze Allah ne farz ki hai, jo inki hifazat kare Allah use bakhsh dega.
(Abu Dawood 425)
(3)
Ramzan ke roze ki Farziyat:
kya Allah ne aap ko ye huqum diya hai ke saal bhar me is mahine Ramzan ke roze rakho?
Aap ﷺ ne farmaya: Han, ya mere Allah.
Allah ﷻ ne farmaya: aye imaan walo tum par roze farz kiye gaye hai, jaise tumse pehle logo par farz kiye gaye the, take tum parhezgar ban jao.
(Surah Al-Baqarah 183)
Allah ﷻ ne farmaya: Ramzan ka mahina wo mahina hai jisme Qur'an nazil kiya gaya, pas jo koi is mahine ko paye wo roza rakhe.
(Surah Al-Baqarah 185)
(4)
Zakaat ki Farziyat:
kya Allah ne aap ko ye huqum diya hai ke jo hum mese maal-daar log hai, unse zakaat wasool karke hamare mohtajo me baant diya karen?
Aap ﷺ ne farmaya: Han, ya mere Allah.
Allah ﷻ ne farmaya: aur namaz Qayam karo aur zakaat do.
(Surah Al-Baqarah 43)
Allah ﷻ ne farmaya: beshak sadakat (zakaat) faqeero, mohtajo, zarurat-mando, dilon ko jodne, ghulamo ki azaadi, maqroozon, Allah ke raste me aur musafiron ke liye hai.
(Surah Tauba 60)
(5)
Han, Ya Mere Allah" Ka Matlab Aur Maqsad:
Is hadees me jab Dhamam bin Sa‘labah ne har sawal ke jawab me Aap ﷺ se tasdeeq chahi, to Aap ﷺ ne jawab me "Haan, Ya Mere Allah!" farmaya.
Aap ﷺ ka "Haan, Ya Mere Allah!" kehna ek tareeqa tha jo:
- Qasam ke taur par tha, yani Allah ki gawahi dena ke yeh baat bilkul sach hai.
- Taqeed aur Mazid Tawajjuh Dene ke liye, yani sirf haan kehne ke bajaye, Allah ki taraf nisbat de kar baat ko aur bhi mukammal aur taqatwar bana diya gaya.
- Sidq aur Amanat ki Tasdeeq — Nabi Kareem ﷺ ne jo hukum diya, woh Allah ka diya hua hai, isme koi shakk ya apni taraf se izafa nahi.