Qur'an aur Hadees me jinnat aur insano ke Talluk ke hawale se wazeh talimaat moujood hai.
Islam me jinnat ka wajood ek haqikat hai aur unke insano par asrat ko bhi taslim kiya gaya hai. Magar iske sath hi muashre me in Mozu'at par gair-islami nazaryat aur rasme bhi raij hai, jinhe Qur'an aur hadees ki roshni me samajhna aur durust karna zaruri hai.
(1)
Jinnat ka wajood Aur insan se Talluk:
Allah ﷻ ne farmaya: maine Jinno Aur insano ko sirf apni ibadat ke liye paida kiya hai.
(Surah Zaariyat 56)
Yani jinn aur insano ka Asal maqsad dunia ke kaamo ke ba-wajood Allah ki ibadat bandagi karna hai.
Allah ﷻ ne farmaya: Aur jinn ko humne Aag ke sholey se paida kiya.
(Surah Rahman 15)
Yahan Allah ne jinnat ki asal paidaish ka zikr kiya hai. Jinnat insano ki tarah physical substance se paida kiye gaye hai, magar insano ka asal mitti hai, jubke jinnat ka asal "be Dhuwan Aag" Hai. Isse maloom hota hai ke jinnat insano se mukhtalif maadda rakhte hai, magar wo bhi Allah ki ek makhlook hai.
Qur'an me ek aur jagah Ata hai: aur ye ke hum mese kuch Saleh hai aur kuch iske bar'aks hai.
(Surah jinn 11)
Is ayat me jinnat ke mijaaz aur rawayye ka zikr hai. Jinnat insano ki tarah mukhtalif qism ke hote hai, kuch nek Parhezgar aur Allah ke bande hote hai, jubke kuch bure aur na-farman hote hai. Ye unka ek ijhtiyari mijaaz hai jo insano ke mijaaz se milta-jhulta hai.
(2)
Jinnat ke Asraat ka Tasawwur:
Qur'an aur hadees me ye baat tasleem ki gai hai ke shaitan jinn insano ko nuksan pohchane ya gumrah karne ki koshish karte hai.
Allah ﷻ ne farmaya: beshak shaitan tumhara Dushman hai pas tum bhi use apna dushman samjho.
(Surah fajar 6)
Is ayat ka maqsad ye hai ke shaitan ka kaam insano ko Allah ki ibadat se door karna aur ghalat raasto par chalana hai. Insan ko behkane aur gumrah karne ke liye shaitan Har tarah ka Raasta istimal karta hai. Is liye momin ko chahiye ke wo Hamesha shaitan ki chaal se hoshiyar rahe aur Allah ki panah mange.
(3)
Shaitan Jinn Ka Insan Par Asar Dalna, ya Pagal Kar dena:
Is masle ka Zikr Hume wazeh tor par Qur'an Aur Hadeeso jub Nahi mila To Humne Aqabir Olema ki Raat ko Talasha, Tab hume pata chala.
Imam Ibn Taymiyyah رحمہ اللہ ki Rai:
Imam Ibn Taymiyyah رحمہ اللہ jinnat ke insan par asar Dalne ko Tasleem karte hai aur ise Qur'an-o-sunnat aur tajurbat ki roshni me sahi mante hai.
Imam Ibn Taymiyyah رحمہ اللہ ne apni Kitab "Majmu-al-Fatawa me Likha: jin insan ke jism me Dakhil ho sakte hai aur ye Haqikat Qur'an-o-sunnat aur tajurbe se sabit hai.
Imam Ibn Taymiyyah رحمہ اللہ ke surah Al-Baqarah 275 me Shaitan ke insan ko chhune ka zikr hai. Ye zikr insan ke jism par jinnat ke Asraat ki dalil hai.
Shaikh Albani رحمہ اللہ ki Rai me bhi humne isi Ayat ko Dalil ke tor par pata aur,
Shaikh Ibn Baz رحمہ اللہ ki Rai me bhi isi ayat ko Dalil ke tor par humne paya hai.
Shaikh Ibn Baz رحمہ اللہ likhte hai: "Qur'an-o-sunnat aur tajurbat ye sabit karte hai ke jinnat insan ke jism me Dakhil ho sakte hai, aur ye koi heran kun bat nahi, kyu ki ye Allah ki makhlook me se hai, aur unhe mukhtalif Salahiyat di gai hai."
(Fatwa-ibn-baz 3/294)
Shaikh Ibn Baz رحمہ اللہ ne kaha: ke Jinnat ke asrat ka ilaj Qur'an-o-sunnat aur masnoon azkar ke zariye kiya jaye aur kisi bhi Gair-sharai tarike se bacha jaye.
(4)
Dargah Mazaraat ka Gair-islami Tasawwur:
Dargah, Mazaraat par jakar jinnat ya kisi aur masle ke hal ki koshish karna shariyat me sakht mana hai. Qur'an majeed me Allah ne huqum diya hai ke ibadat aur madad sirf usi se mangi jaye.
Allah ﷻ ne farmaya: masjiden Allah hi ke liye hai, pas Allah ke sath kisi ko Shareek na thehrao.
(Surah jinn 18)
Nabi ﷺ ne farmaya: jub tum mango to Allah se mango aur jub madad chaho to Allah hi se madad chaho.
(Tirmizi 2516)
In dalilo se ye wazeh hota hai ke madad aur ibadat ka haq sirf Allah ka hai, kisi aur muqaam ya shaks ka nahi.
(5)
Dargaho par theek hone ka Pehlu:
Islam ke mutabik insan ki har dua aur madad ka Asli markaz sirf aur sirf Allah hai. Dargaho Aur mazaro par jakar Apne masail ka hal talashna islami talimaat ke khilaaf hai.
Aise waqiyat jahan log mazaro par jakar theek hone ka daawa karte hai, shaitani Dhoke ka Natija hote hai. .
Pehle is ayat par ghor kijiye: Allah ﷻ ne farmaya: aur jub mere bande mere bare me apse sawal kare, to kehdo mai kareeb hun unke, aur phukaarne wale ki phukaar ko sunta hun aur Qubool karta hun jub wo mujhse Dua karta hai.
(Surah Al-Baqarah 186)
Jo log dargaho se ummeed rakhte hai wo Allah ke is is Qurb aur madad ko bhool jate hai aur apne masail ka hal Allah ke alawa kahi aur talaash karte hai.
Shaitan insan ko Gumrah karne ke liye Har mumkin Koshish karta hai. Uska maqsad insan ko shirk aur biddat ki taraf dhakelna hota hai, jub koi shaks mazaar par jakar "theek hone" ka daawa karta hai, to ye Mumkin hai ke shaitan ne us shaks ko gumrah karne ke liye ye plan Kiya ho.
Asal me shaitan pehle Dekh leta hai ke insan ka imaan kitna mazbut aur kitna kamzor hai, uske baad wo khud hi insan ko pareshan karta hai fir pure ghar ko usse pareshani hoti hai, aur jub wo mazaar ya kisi aur Gair-sharai jagah jakar Apna Aqidah kharab kar lete hai tab shaitan ka maqsad poora ho jata hai aur wo khud hi us insan ko pareshan karna chhod deta hai
Allah ﷻ ne farmaya: Shaitan tumhe fiqr se darta hai, aur be-hayai ka huqum deta hai, magar Allah tumhe bakshish aur fazal ka wada deta hai.
(Surah Al-Baqarah 268)
Nabi ﷺ ne farmaya: shaitan insan ke andar Khoon ki Tarah Daudta hai.
(Sahih Bukhari 3281)
Nabi ﷺ ne shaitan ke insani Jazbaat aur amal par asar dalne ki salahiyat ko is andaaz me samjhaya ke wo insan ke jism me khoon ki tarah Daudta hai. Iska matlab ye hai ke shaitan insan ke jazbaat, khayalat aur faisle par bure asraat dalne ki koshish karta hai.
Nabi ﷺ ne farmaya: jo Shaks hamare Deen me koi aisi nai cheez dakhil kare jo Isme na Ho, To Wo amal Mardood hai.
(Sahih Bukhari 2697)
Nabi ﷺ ne ye wazeh kiya ke Deen me kisi naye amal ya biddat ko dakhil nahi karna, jo Qur'an-o-sunnat me na ho, Allah ke nazdeek qubool nahi hai. Har Amal sirf wahi qubool hai jo Allah aur uske rasool ﷺ ki talimaat ke mutabik ho.
(6)
Shaitan jinn ke Asraat se Bachne Ke Tarike:
Qur'an aur hadees me Shayateen ke Asraat se bachne ke liye mukhtalif duayen aur azkar maujood hai. Jinhe musalman apni rozmarra ki zindagi ka hissa banaye to kabhi in pareshanio me mubtala na ho.
- Jo shaks Raat ko Ayat-ul-qursi padhta hai, Allah uski hifazat ke Liye ek farishta mukarrar kar deta hai. (Sahih Bukhari 2311)
- Surah Falaq aur Surah Naas aur Surah ikhlas subha-shaam teen teen Martaba padhne wale ko Har Shar se mehfooz rakha jata hai. (Abu Dawood 5082)
- Nabi ﷺ ne farmaya: shaitan Us ghar me dakhil nahi hota jis ghar me surah Al-Baqarah padhi jati hai. (Tirmizi 2877)
- Nabi ﷺ ne farmaya: jo shaks Ghar se nikalte waqt BISMILLAHI TAWAQ'QALTU ALILLAHI LA-HAULA'WALA QUWWATA ILLAH BILLAH padh le, To shaitan usse door hoga. (Tirmizi 3426)
- Ibn Taymiyyah (Rahimahullah):Ibn Taymiyyah ne farmaya ke agar kisi par jinnat ka asar ho, to Quran ki tilawat, Ayat-ul-Kursi, Surah Al-Falaq, Surah An-Naas aur Allah ka zikr uska ilaaj hai. Jinnat Quran ki aawaz bardasht nahi karte aur ya to bhaag jate hain ya phir insaan ko azaad kar dete hain. (Majmu' al-Fatawa).
- Shaykh Albani (Rahimahullah):Shaykh Albani ka kehna tha ke masnoon ruqya aur Quranic ayat shayateen aur jinnat ke asraat ke khilaf kaafi hain. Kisi bhi amal me bid’at aur shirk shamil nahi hona chahiye.
- Shaykh Ibn Baz (Rahimahullah):Shaykh Ibn Baz ne bhi wahi masnoon azkar aur ruqya ke amal ko tasleem kiya jo Nabi ﷺ se sabit hain. Unhone ghair-shari tareeqon, jaadu-tona ya mazarat par jaane ki sakht mukhalifat ki.