Jareer bin Abdullah رضي ko suna. Unhone kaha:
"Allah se daro jo akela hai aur uska koi shareek nahi, aur waqar aur sukoon ikhtiyar karo yahan tak ke tumhare paas Naya ameer aa jaye. Wo ankareeb tumhare paas pohachne wala hai".
Phir unhone kaha: apne ameer ke liye maafi ki dua karo kyu ke wo maafi ko pasand karta tha."
Phir kaha: 'Amma Ba'ad! Mai nabi-e-kareem ﷺ ke paas Aya aur arz kiya ke main aap se Islam par bay'at karta hun. Aap ne mujhse shart li ke har musalman ke sath Khair-khwahi karunga. To maine isi shart pe aap se bay'at ki. Qasam hai is masjid ke Rub ki! Mai tumhare liye nasihat karne wala hun. ' phir unhone istagfaar kiya aur mimbar se niche utar gaye.
(Sahih Bukhari 58)
Ye hadees mukhtalif Aiham Mozu'at par roshni dalti hai. Ise Qur'an aur hadees ki roshni me tafseel se samjha ja sakta hai.
(1)
Allah se daro jo akela hai aur uska koi shareek nahi:
Allah ﷻ ne farmaya: aye imaan walo Allah se aise daro jaise usse darne ka haq hai. Aur marna to musalman hi marna.
(Surah Al-imran 102)
Is ayat me Allah ne imaan walo ko taqwa ikhtiyar karne ka huqum diya hai. Taqwe ka matlab hai Allah ka khoff rakhna, uski itaat karna aur jin kamo ko Allah pasand nahi karta unse bachna.
Allah se darr ka matlab ye nahi ke insan sirf Allah ke azaab se ghabraye, balke ye bhi hai ke insan Allah ke huqooq ko pura kare, uski ibadat kare aur har waqt uske Huqm ke mutabik zindagi guzare.
Nabi-e-kareem ﷺ ne farmaya: jahan bhi raho Allah se daro.
(Tirmizi 1987)
Is hadees me nabi ﷺ ne taqwe aur Allah ka Khof har jagah aur halat me ikhtiyar karne ki Hidayat di hai.
Chahe insan tanha ho ya logo ke darmiyan, wo har waqt Allah ka khof rakhe. Allah ki Qudrat har jagah moujood hai. Aur Allah har waqt dekh raha hai. Is wajah se sirf logo ke samne hi nahi balke tanhai me bhi Allah ke huqum ke mutabik zindagi guzarna Zaruri hai.
(2)
Waqar aur Sukoon Ikhtiyar Karo:
Allah ﷻ ne farmaya: rehman ke bande to wo hai jo zameen par aajizi ke sath chalte hai.
(Surah Furqan 63)
Is ayat me Allah ne apne khaas bande ko shaan bayan ki hai ke wo zameen par aajizi aur inkisari ke sath chalte hai.
Yahan Aajizi ke sath chalne ka matlab ye hai ke insan apne rawayye aur akhlaq me mutawazan ho. Takabbur aur ghamand se door rahe. Rehman ke bande apni chaal-dhaal, bol-chaal aur har Amal me waqar aur sukoon ka izhar karte hai. Wo kisi ko nuksan nahi pohchate aur logo ke sath naram rawayya ikhtiyar karte hai.
Nabi-e-kareem ﷺ ne farmaya: Allah har muamle me Narmi ko pasand karta hai.
(Sahih Bukhari 6024)
Is hadees me Nabi ﷺ ne mamle me narmi aur barabari ikhtiyar karne ki Hidayat di hai. Narmi ka matlab hai ke insan gusse aur sakhti se bache aur har kaam soch samajh kar sukoon aur sabr ke sath kare.
Narmi sirf bol-chaal tak mehdood nahi, balke ye insan ke rawayye ka har hissa ban Jani chahiye. Insan ka rawayya uske gharwalo, dost aur hatta ke apne dushmano ke sath bhi narm ho. Allah ke rasool ﷺ ka rawayya logo ke sath hamesha narm aur Mohabbatana hota tha, aur aap logo ke gunaho par sakhti karne ke bajaye unhe samjhane aur maaf karne par Tarjih dete the.
(3)
Apne Ameer ke Liye maafi ki Dua karo Kyu ke wo maafi ko pasand karta tha:
Allah ﷻ ne farmaya: beshak Allah tumhe Huqum deta hai ke Amanato ko unke haqdaro ko pohcha do.
(Surah nisa 58)
Is ayat me Allah ne insan ki zindagi ke ek Aiham pehlu ki taraf Tawajjo dilai hai. Jo ke amanat dari aur insaaf hai. Amanat sirf maal ya cheez tak mehdood nahi hoti, balke wo har zimmedari jo kisi ke supurd ki jaye, use theek tarike se ada karna bhi amanat hai.
Jo shaks kisi zimmedari jaise (Ameer ) ka farz ada kar raha ho, uski khidmat aur mehnat ko samajhna chahiye. Iska matlab ye hai ke agar wo apni duty poori niyat aur imandari ke sath kare, to uske liye dua aur shukriya ka izhar karna chahiye.
Nabi-e-kareem ﷺ ne farmaya: jo logo ka shukr Ada nahi karta, wo Allah ka shukr Ada nahi karta.
(Tirmizi 1954)
Is hadees me nabi ﷺ ne shukriya ada karne ki Ahmiyat ko Bayan kiya hai. Insani rawayye ka ek Aiham pehlu ye hai ke agar koi shaks aap ke liye mehnat kare ya apki madad kare, to uska shukriya ada karna chahiye.
Ameer ki misaal me agar wo apni zimmedari puri imandari aur maafi ke rawayye ke sath ada kare, to uski koshish ko sirf appreciate hi nahi, balke Allah se uske liye maafi aur behtari ki dua karni chahiye.
(4)
Mai nabi-e-kareem ﷺ ke paas aya aur bait ki ke har musalman ke sath Khair-khwahi karunga:
Allah ﷻ ne farmaya: aur neki aur taqwe ke Kaam me Ek dusre ka sath do.
(Surah maida 2)
Is ayat me Allah ne logo ko hidayat di hai ke wo apne behtreen amal aur taqwe ke kaam me ek dusre ka sath dene. Iska matlab hai ke musalman ek dusre ke liye sirf achai ka sochen aur usme madad kare.
Khair-khwahi ka sabse bada pehlu ye hai ke kisi bhi musalman ki behtari ke liye kaam kiya jaye, uske dukh aur Mushkilat ko kam kiya jaye aur uske liye ache mashwara diye jaye.
Nabi-e-kareem ﷺ ne farmaya: Deen Khair-khwahi ka naam hai. Sahaba-e-kiram رضي ne puchha kiske liye? Aap ﷺ ne farmaya: Allah ke liye, uski kitab ke liye, rasool ke liye, musalmano ke ameer ke liye, Aur tamam musalmano ke liye.
(Sahih Muslim 196/ int 55)
Nabi-e-kareem ﷺ ne Deen ka asal maqsad Khair-khwahi bayan kiya hai. Iska matlab hai ke Allah ke aihkamat ka palan karna aur sirf usi ki ibadat karna.
Qur'an-o-sunnat par amal karna aur uske paigam ko dusro tak pohchana.
Nabi ﷺ ki sunnat par amal karna aur use zinda rakhna.
Har musalman ke liye ache Jazbaat rakhna, unke liye dua karna, unki madad karna.
(5)
Qasam hai Is masjid Ke Rub ki Mai Tumhare Liye Khair-khwah hun:
Allah ﷻ ne farmaya: Momin to apas me bhai-bhai hai.
(Surah hujurat 10)
Is ayat me Allah ne musalmano ke darmiyan bhai-chare ko bayan kiya hai. Momin ek dusre ke liye mohabbat, Humdardi aur Khair-khwahi ka jazba rakhte hai, jaise ek bhai dusre bhai ke liye rakhta hai.
Khair-khwahi ka matlab hai musalman ek dusre ki bhalai ka soche, uski madad kare, uske mushkil waqt me uska sath den. Apas ke ikhtilaf ko bhula kar mohabbat aur ekta ka rawayya ikhtiyar kare.
(6)
Phir unhone istagfaar kiya aur mimbar se niche utar gaye:
Allah ﷻ ne farmaya: Allah se maafi mango, beshak Allah maaf karne wala reham karne wala hai.
(Surah nisa 106)
Is ayat me Allah ne apne bande ko maafi mangne ki Hidayat di hai. Allah ﷻ ki sifat "Ghafoor" aur "Raheem" hai, yani wo apne bando ko maaf karne aur reham karne wala hai. Isliye, agar insan se koi galti ho jaye, to Allah se maafi mangna chahiye, kyu ke Allah ka reham Aur maafi Har cheez se badhkar hai.
Nabi-e-kareem ﷺ ne farmaya: main ek din me Allah se 100 baar istagfaar karta hun.
(Sahih Muslim 6858/ int 2702)
Nabi-e-kareem ﷺ ne apne amal se ye dikhaya ke istagfaar sirf unhi logo ke liye nahi hai jo badi galtiyan karte hai, balke nabi ﷺ apne liye bhi rozana Allah se maafi mangte the. Iska matlab hai hamari zindagi me istagfaar ka amal har waqt hona chahiye, chahe hum kitna bhi taqwa re akhte ho parhezgari karte ho ya ibadat karte ho.
NOTE:
- Allah ka khoff apni zindagi me har waqt rakhna chahiye, take hum uski Raza aur itaat me rahe.
- Zindagi me aajizi aur sabr se kaam lena, aur Hamesha narm aur tawajjo se pesh aana chahiye.
- Apne Ameer ke liye dua karna, uski mehnat ko samajhna aur unke liye Allah se maafi aur rehmat ki dua karna chahiye.
- Har musalman ke liye behtari aur madad ka jazba rakhna, aur ek dusre ke liye achi dua karna chahiye.
- Musalman apas me mohabbat aur ek dusre ke ikhtilaf bhula kar ek dusre ke liye Madadgaar bane.
- Apni galtiyon ke liye Allah se maafi mangna, chahe hum kitni bhi ibadat karte ho, taqwa rakhte hon aur parhezgar hon, Allah ka Reham Hamesha zaruri hai.