Najd walo me se ek shaks, Aap ï·º ke paas aya, sar pareshan yani baal bikhre huwe the, hum iski awaz ki bhinbhinahat sunte the aur hum samajh nahi pa rahe the ke wo kya keh raha tha. Yahan tak ke wo kareeb aa pohcha, jub maloom hua ke wo Islam ke bare me puchh raha hai. Aap ï·º ne farmaya: ke Islam me din raat me 5 namazen parhna hai, isne kaha bas iske siwa to aur koi namaz mujhe par nahi? Aap ï·º ne farmaya: nahi magar to nafil parhe to aur baat hai. Aap ï·º ne farmaya: aur ramzan ke roze rakhna. Isne kaha aur to koi roza mujh par nahi hai? Aap ï·º ne farmaya: nahi magar tu nafil roze rakhe to aur baat hai. Aap ï·º ne ise zakat ka bayan kiya. Isne kaha bus aur koi sadqa mujh par nahi hai? Aap ï·º ne farmaya: nahi magar tu nafil sadqa de to aur baat hai. Rawi ne kaha fir wo shaks peeth mod kar chala. Yun kehta jata tha. Khasam khuda ki me na isse badhunga na ghatunga. Aap ï·º ne farmaya: agar ye sacha hai to apni muraad ko pohach gaya.
(Sahih Bukhari 46)
Ye hadees Islam ke buniyadi arkan aur unki pabandi ke hawale se ek jami aur asan bayan pesh karti hai.
(1)
Panch Waqt Ki Namaz:
Nabi ï·º ne farmaya: din aur raat me panch namaze.
Namaz Islam me sabse Aiham aur har musalman par Farz hai.
Jaise ke Allah ï·» ne farmaya: Beshak namaz momino par waqt mukarrar par farz hai.
(Surah nisa 103)
Is ayat ka maqsad ye hai ke Allah ne namaz ko ek mukarrar waqt par farz kiya hai. Har waqt ki namaz ka apna ek Aiham muqaam aur asar hai. Fazar ke waqt ka Agaaz roshni aur Allah ki yaad ke sath hota hai. Aur isha ka ahtemaam sukoon aur dua ke sath.
Allah ki taraf se waqt ka mukarrar hona ye dikhata hai ke ye sirf ek zimmedari nahi balke musalman ke liye ek tarteeb aur discipline ka sabak hai.
Nabi ï·º ne farmaya: namaz Deen ka sutoon hai.
(Tirmizi 2616)
Is hadees me nabi ï·º ne namaz ko Deen ka sutoon kaha hai. Sutoon ek imarat ka wo hissa hota hai jo puri imarat ko Sambhal kar rakhta hai. Agar sutoon mazbut ho to imaarat bhi mazbut hoti hai, agar sutoon kamzor ho to imaarat gir sakti hai.
Iska matlab ye hai ke namaz musalman ke Deen ki ek buniyad hai. Agar musalman apni namaz ko theek tarah se ada kare, to uska baaki Deen, amaal bhi sudharte hai.
(2)
Ramzan ke Roze:
Ramzan ke roze har balig musalman par farz hai. Jaisa ke Qur'an me Allah ï·» ne farmaya: Aur Imaan walo tum par Roze Farz kiye gaye hai jaisa ke tumse pehle logo par farz kiye gaye, take tum parhezgar ban jao.
(Surah Al-Baqarah 183)
Is ayat me Allah ne roze ka huqum diya aur iska maqsad "Taqwa" yani parhezgari ko karar diya. Roza sirf bhook aur pyas sehne ka naam nahi, balke ye ek musalman ke liye Allah ke huqum par amal karne aur Apni nafsani khwahishat par Qabu pane ka tarika hai. Ye ek ruhani aur akhlaqi tarbiyat hai, jo insan ke andar sabr, Shukr Aur Taqwe ko barhati hai.
Roza insan ke aur Allah ke beech ek khaas Talluk ka zariya hai.
Ye ayat ye samjhati hai ke ramzan ka asli maqsad insan ke andar Allah ka darr aur uski Raza talash karne ka jazba paida karna hai.
Nabi ï·º ne farmaya: jo shaks ramzan ke roze imaan aur sawab ki niyat se rakhe, uske pichhle gunah maaf kar diye jate hai.
(Sahih Bukhari 1901)
Is hadees se ye sabit hota hai ke ramzan ke roze sirf ek ibadat nahi, balke ek Azeem sawab aur gunaho ki maafi ka zariya hai, lekin ye sawab tabhi hasil hot hai jub.
- Banda Allah par yaqeen aur uske Huqum ke aage sar jhuka kar roza rakhe.
- Banda is niyat ke sath roza rakhe ke uska sawab sirf Allah se milega.
(3)
Zakaat:
Zakaat maal ko paak karne aur gareebo ki madad ka zariya hai.
Allah ï·» ne farmaya: namaz Qayam karo aur Zakaat ada karo.
(Surah Al-Baqarah 43)
Is ayat se ye samajh ata hai ke namaz aur zakaat dono Islam ke Aiham rukan hai, namaz ek shakshi ibadat hai jo Allah ke sath bande ke talluk ko mazbut karti hai. Jub ke Zakaat ek muashrati ibadat hai jo gareebo ki zarurat ko pura karti hai. Aur muashre ke andar insaaf aur Musawwat ka nizaam Qayam karti hai.
Nabi ï·º ne farmaya: Allah ne unke maal me zakaat farz ki hai, jo ameero se jaye, Aur gareebo ko di jaye.
(Sahih Bukhari 1395)
Is hadees se ye wazeh hota hai ke zakaat ka maqsad ameer tabke ke maal ka hissa gareebo tak pohcha kar insani zarurat ko pura karna hai. Iska nizam Allah ke huqum ke mutabik chalaya jata hai. Jo muashre me insaaf aur samaaj me barabari ko Barkarar rakhta hai.
Zakaat gareebo ke liye madad ka ek zariya hai jo unki zarurat ko pura karta hai, aur muashre me gareebi ko kam karta hai. Zakaat ka nizaam Allah ne is maqsad se banaya hai ke Har insan aur aur tabka barabar ho jaye. Koi gareeb miskeen na rahe.
(4)
Nafil ibadat ki ijazat:
Nafil ibadat farz ke alawa izafi ibadat hai jo Allah ke qurb ka zariya banti hai.
Allah ï·» ne farmaya: Aur raat ke waqt tahajjud padha karo jo tumhare liye nafil hai take tumhara rub tumhe muqaam-e-mehmood ata kare.
(Surah israeel 79)
Nafil ibadat wo izafi ibadat hai jo Ek musalman apne farz ke alawa Allah ki Raza aur Qurb Hasil karne ke liye karta hai. Ye ibadat insan ke ruhani darje ko buland Aur Allah ki rehmat aur barkat hasil karne ka zariya banti hai.
Is ayat me Allah ne tahajjud ki namaz ko nafil nafil ibadat qarar diya hai. Jo insan ko muqaam-e-mehmood hasil karne ka zariya banta hai. Ye ibadat ek musalman ke liye ruhani tarbiyat ka ek khaas zariya hai. Raat ke waqt uth kar Allah ke huzoor ibadat karna, insan ke dil aur nafs ko Allah ki taraf mutawajje karta hai aur uske Jazbaat me ikhlas aur shukr paida karta hai.
Nabi ï·º ne farmaya: Qayamat ke Din bande ke amaal me sabse pehle namaz ka hisaab hoga, agar wo durust hui to baki amaal bhi durust honge, agar wo kharab Hui to nafil namazo ko farz namazo ki ginti me Mila dega.
(Nasai 466)
Agar kisi farz namaz me kami ya kharabi ho, to uski nafil namazo ko farz ki kami pura karne ke liye istimal kiya jayga.
Ek musalman ke liye ye zaruri hai ke wo nafil ibadat ko apni rozmarra zindagi ka hissa banaye. Take wo dunia aur Akhirat dono me Allah ki rehmat aur barkat hasil kar sake.
(5)
Agar Wo Sachha Hai To Qamyab Hua:
Allah ï·» ne farmaya: jo koi apne Rub se Mulakat ki Ummeed rakhta hai, use chahiye ke nek amal kare aur Apne rub ki ibadat me kisi ko Shareek ka na kare.
(Surah Kahaf 110)
Allah ke huzur qubuliyat aur inaam ke liye zaruri hai ke banda apni zindagi me nek aur shariyat ke mutabik amal kare. Nek amal wahi hai jo Allah ki Raza ke liye kiya jaye. Aur Qur'an aur sunnat ke mutabik ho.
Ye ayat insan ko nek amal aur ikhlas par mazbuti se amal karne ki taraf dawat deti hai.take wo Akhirat me Allah ke Qurb aur jannat ka mustahiq ban sake.
Nabi ï·º ne farmaya: Har shaks ko Wahi milega jiski usne niyat ki.
Amal ka darja aur qubuliyat sirf niyat par mabni hai. Agar kisi amal ki niyat Allah ki Raza hasil karna ho, to wo amal qubool hoga. Lekin agar niyat duniavi fayda ya dikhawa ho, to wo amal Allah ki nazar me Qabil-e-Qubool nahi hoga.
Har shaks ko uski niyat ke mutabik inaam ya saza milegi, ye hadees ye wazeh karti hai ke insan ke har Amal ka daromadar Sirf uski niyat par hai.
NOTE:
Ye hadees Islam ke buniyadi arkan yani namaz, roze, zakaat aur nafil ibadat ke fazail ko wazeh karti hai. Iske sath niyat aur sachchai ki ahmiyat par zor deti hai. Agar koi musalman in arkan ko Khuloos-e-Dil ke sath ada kare, to wo dunia aur Akhirat dono me kamyab hoga.