Hazrat Ayesha رضي se rivayat hai ke nabi ﷺ unke paas tashreef laaye, Us waqt unke paas ek aurat thi, Aap ﷺ ne pucha ye kon hai? Hazrat Ayesha رضي ne kaha: ye falan khatoon hai, apni kasrat-e-namaz ka zikr kar rahi hai. Aap ﷺ ne farmaya: ruk jao! Tum wahi amal ikhtiyar karo jo tumhari takat me ho, Kyu ke Allah kabhi Thakta nahi hai, magar tum thak jaoge. Aur Allah ko Deen me sabse mehboob amal Wo hai jo hamesha kiya jaye.
(Sahih Bukhari 43)
Ye hadees Hume ibadat me aitedal, mustakil mijazi ki taleem deti hai. Allah ke nabi ï·º ne ibadat ke mamle me insan ke fitri hudood aur kamzoriyo ka khyal rakhne ka huqum diya hai.
Allah ï·» ne farmaya: Allah kisi jaan par uski Takat se zyada bojh nahi dalta.
(Surah Al-Baqarah 286)
Ye ayat insan ki fitrat aur kamzoriyo ko bayan karti hai. Allah insano ko unki istitaat (capacity) ke mutabik hi zimmedariyan deta hai. Chahe wo ibadat ho, duniavi zimmedariyan ho, ya kisi mushkil halaat ka samna karna ho. Isme hame ye tasalli milti hai ke Allah ï·» hamesha insaaf karta hai, aur kabhi kisi par had se zyada bojh nahi dalta.
Is ayat ka Talluk ibadat se bhi hai. Allah ï·» ne ibadat ke liye asaan aur sahulat ka rasta diya hai. Jaise namaz, roza, zakaat, Hajj. Agar insan kisi halat me kisi ibadat ko pura na kar sake, uske liye asani di gai hai, jaise mareez namaz ko baith kar ya ishare se padh sakta hai. safar karne wale ke liye rozo me asaniya di gai hai.
Allah ï·» ne farmaya: aur jo kuch Allah ne tujhe diya hai, usse Akhirat ka ghar Talab kar, aur dunia me Apna Hissa na Bhool.
(Surah Qasas 77)
Allah ï·» hume ye sikha Raha hai ke insan ki zindagi ka asal maqsad Aakhirat ki kamyabi hai. Dunia ke tamam maal-o-daulat, auqat aur auqat-e-Fursat ko Akhirat ke liye istimal karna chahiye. Magar iska ye matlab nahi ke dunia ke huqooq ko nazar-andaaz kar diya jaye.
Ye ayat Hume dunia aur Akhirat ke darmiyan tawazun (balance) sikhati hai. Insan ko sirf dunia ke piche nahi lagna chahiye, balke Akhirat ka bhi sochna chahiye, sath hi dunia ki zarurat aur huqooq ka bhi ehtimam karna chahiye. Kyu ki akhirat ki tayyari ka Madadgaar dunia ka sahi istimal hi ho sakta hai.
Nabi ï·º ne farmaya: sabse mehboob Amal Allah ke nazdeek wo hai jo Hamesha kiya jaye, chahe wo thoda hi kyu na ho.
(Sahih Bukhari 6464)
Is hadees ka paigam ye hai ke Allah ï·» ko wo amal pasand hai jo mustakil mizaji ke sath kiya jaye. Chahe wo thoda ho.
Consistency Allah insani fitrat ko samjhata hai aur chahta hai ke insan apne amaal me lagatar rahe. Kabhi-kabhi bohot zyada ibadat ya nek amal karna aur fir chhod dena Allah ke nazdeek pasandida nahi. Thoda amal lekin lagatar karna insani rooh ko behtreen banata hai.
Amali Naseehat:
- Ibadato ko ek mamool ka hissa banao, chahe wo kam mikdar me ho, is tarah dil me Khushi aur khuzu Qayam rehta hai aur ibadat ka Zauq-o-Shauq barkarar rehta hai.
- Ibadat me aitedal ke bagair insan jald thak jata hai aur bezaar ho sakta hai, jo ibadat ke asal maqsad ke khilaaf hai.