Mai Abdullah bin Abbas رضي ke paas baitha karta tha, wo mujhe khaas Apne takht par baithate. (Ek Dafa) Kehne Lage ke tum mere paas mustaqil tor par reh jao, mai apne maal me se tumhara hissa mukarrar kar dunga. To Mai do mahine tak unki khidmat me reh gaya. Phir kehne lage ke abdul qais ka wafd Jub nabi-e-kareem ﷺ ke paas aya to aap ne puchha ke ye konsi Qom ke log hai ya ye wafd kahan ka hai? Unhone kaha ke rabi'ah Khandan ke log hai. Aap ﷺ ne farmaya marhaba is Qom ko ya wafd ko na zaleel hone wale na sharminda hone wale (yani in ka Aana bohot khoob hai)
Wo kehne lage: Aur Allah ke rasool ﷺ! Hum apki khidmat me in hurmat wale mahino me aa sakte hai, kyu ki hamare aur aap ke darmiyan mudar ke kafiro ka qabila Aabaad hai. Pas aap humko ek aisi qat'i baat bata dijiye jiski khabar hum apne pichhle logo ko bhi kar den jo yahan nahi aye, aur is par amal karke hum jannat me dakhil ho jaye. " Aur unhone Aap ﷺ se apne bartano ke bare me bhi puchha.
Aap ﷺ ne unko chaar bato ko huqum diya aur chaar qism ke bartano ke istimal se mana farmaya. Unko huqum diya ke akele Allah par imaan lao. Phir Aap ﷺ ne puchha jante ho ek akele Allah par imaan lane ka matlab kya hai? Unhone kaha Allah aur uske rasool ﷺ hi behtar Jante hai.
Aap ﷺ ne farmaya: " is baat ki gawahi dena ke Allah ke siwa koi ibadat ke layak nahi aur ye ke mohammad ﷺ uske sachhe rasool hai, aur namaz Qayam karna, aur zakaat Ada karna, aur ramzan ke roze rakhna, aur maal-e-ganimat se jo mile uska panchwa hissa (musalmano ke bait-ul-maal me) Dakhil karna"
Aur chaar bartano ke istimal se Aap ﷺ ne unko mana farmaya.
- Sabz laakhi martaban se.
- Kaddu ke banaye huwe bartano se.
- Lakri ke khode huwe bartano se.
- Aur rogan lagaye huwe bartano se.
Aur Farmaya:" in baato ko yaad karlo aur un logo ko bhi bata do Jo tumhare sath yahan Nahi Aye hai.
(Sahih Bukhari 53)
(1)
Hazrat Abdullah bin Abbas رضي ka Akhlaq Aur Ilm Ki Ahmiyat:
Hadees ke Agaaz me Hazrat Abdullah bin Abbas رضي الله أن ka apne shagird ke sath Husn-e-sulook aur unhe apne sath baithane ka zikr hai. Ye ilm ki Qadr-o-manzilat aur ustaad aur shagird ke talluk ki ahmiyat ko ujagar karta hai.
Allah ﷻ ne farmaya: Allah tum mese un logo ko jo imaan laye hai aur jo ilm diye gaye hai unke Darje Buland kar dega.
(Surah mujadala 11)
Nabi-e-kareem ﷺ ne farmaya: ilm Hasil karna har musalman par farz hai.
(Ibn-e-majah 224)
Hazrat Abdullah bin Abbas رضي ka apne shagird ko ilm sikhane ke liye waqt dena aur unke Qiyam ka intizam karna ilm ke farog aur shagirdo ke sath husn-e-sulook ki ek behtreen misaal hai.
(2)
Nabi-e-kareem ﷺ ki mehman-nawazi Aur Khush-Amadeed kehna:
Jub abdul qais ka wafd aya, to nabi ﷺ ne farmaya: marhaba is Qom ko ya wafd ko jo na zaleel hone wale hai aur na Sharminda hone wale hai.
Ye nabi-e-kareem ﷺ ke Akhlaaq aur mehmano ko izzat dene ko Zahir karta hai.
Jaisa ke Allah ﷻ ne farmaya: Aur beshak aap Akhlaq ke Aala darje par hai.
(Surah Qalam 4)
Nabi-e-kareem ﷺ ne farmaya: jo shaks Allah aur Qayamat ke din par imaan rakhta hai, use chahiye ke wo apne mehman ka aitram itqram kare.
(Sahih Bukhari 6018)
(3)
Deen Ki Jame Hidayat Talab Karna:
Wafd ne Nabi-e-kareem ﷺ se guzarish ki ke unhe aisi Hidayat di jayen Jin par amal kar ke Wo jannat me Dakhil ho jaye. Isse ye Zahir hota hai ke Deen Aasani Ka naam hai aur isme Jame Hidayat di gai hai.
Allah ﷻ ne farmaya: Allah ne Deen me tum par koi tangi nahi Rakhi.
(Surah hajj 78)
(4)
Imaan Ki Wazahat:
Nabi-e-kareem ﷺ ne imaan ki wazahat karte huwe farmaya: ke Allah ki yaqtai aur Muhammad ﷺ ki nabuwat par imaan lana imaan ki asal buniyad hai.
Allah ﷻ ne farmaya: Allah ne khud ye gawahi di ke Allah ke siwa koi ma'bood nahi, aur uske farishto ne, aur ilm walo ne bhi.
(Surah Al-imran 18)
(5)
Namaz Qayam karna:
Namaz Deen ka sutoon hai Aur jannat me Dakhil e Ka Zariya hai:
Allah ﷻ ne farmaya: beshak namaz Be-Hayai aur bure kamo se rokti hai.
(Surah ankabat 45)
Nabi ﷺ ne farmaya: namaz Deen ki Buniyad hai.
(Tirmizi 2616)
(6)
Zakaat Ada karna:
Zakaat musalmano ke maali nizaam ko Mazbut banati hai Aur Maashi insaaf ka zariya hai.
Allah ﷻ ne farmaya: Namaz Hamesha Padhte raho aur Zakaat diya karo.
(Surah Al-Baqarah 43)
Nabi ﷺ ne farmaya: zakaat maal ko paak karti hai.
(Sahih Bukhari 1404)
(8)
Maal-e-ganimat Men Khums:
Islam ke muashre Me Khums Yani (Panchwa Hissa) bait-ul-maal ke zariye Ghareebo, miskino aur Zarurat-mand logo tak pohchaya jata hai.
Allah ﷻ ne farmaya: aur jaan lo jo maal-e-ganimat tum hasil karo, Uska panchwa Hissa Allah aur uske rasool ﷺ ka hai.
(Surah Anfal 41)
(9)
Bartano Ki mana't:
Nabi ﷺ ne un bartano ko mana farma diya jo us waqt Nasha awar mashrubat ke liye istimal hote the, ya jinme mashroob Kharab Ho Sakta tha.
1. Sabz Lakhi Martaban:
Ye matti ke wo bartan the Jin par sabz rang ka lak ya rogan lagaya jata tha. Aksar in bartano ka istimal sharab ya Nasha awar chizo ko banane ya mehfooz rakhne ke liye kiya jata tha. (Sahih Muslim 5183 / int 1996)
2. Kaddu ke Banaye Huwe Bartan:
Kaddu ke khol ko andar se khol kar banaya jata tha aur aksar inka istimal sharab banane ke liye hota tha, kyu ki inme sharab jaldi Tayyar ho jati thi. (Sahih Muslim 5202 / int 1998)
3. Lakri ke Khode Huwe Bartan:
Ye lakri ke wo bartan the jinhe andar se khof kar banaya jata tha aur un par rogan ya matti ka lep lagaya jata tha, ye bartan sharab ko mehfooz rakhne ke liye mashhoor the. (Sahih Muslim 115/ int 17)
4. Rogani Bartan:
Ye wo bartan the jinke andar rogan ya mom lagai jati thi take mashrubat ko mehfooz rakha ja sake. Aksar inka istimal sharab banane ke liye hota tha. (Sahih Muslim 5172/ int 1995)
NOTE:
Ye hadees islam ke buniyadi aqaid, ibadat, maali muamlat aur muashrati akhlaqiyat ka jame' khaka pesh karti hai. Har pehlu Qur'an-o-sunnat ki roshni me jannat ki taraf rehnumai karta hai.
In bartano ki Manahi baad me nabi ﷺ ne Khatm kar di thi, ibtidaai tor par in bartano ke istimal se is liye mana kiya gaya tha kyu ke wo aam tor par sharab ya Nasha awar chizo ke liye istimal hote the. Baad me Jub Sharab ko Mukammal tor par Haram karar de diya gaya aur musalman sharab se door ho gaye. To in bartano ke istimal ki mumaniyat baki na rahi.
Nabi ﷺ ne farmaya: maine tumko kuch bartano se mana kiya tha, Bartan kisi cheez ko halal karte hai na haram, Har bartan me piyo, magar koi Nasha awar cheez na piyo.
(Sahih Muslim 5208-5209/ int 977)
