Nabi ﷺ ne chand logo ko kuchh atiya diya aur saad bin Abi waqqas رضي wahan maujood the, nabi ﷺ ne un mese ek shaks ko kuchh na diya, halanke wo unme mujhe sabse zyada pasand tha, maine kaha huzoor ﷺ aap ne use kuchh na diya Halanke me use momin guman karta hu, aap ﷺ ne farmaya: momin ya musalman? Mai thodi der chup reh kar fir pehli baat dohrane laga, nabi ﷺ ne bhi dobara wahi jawab diya, fir aap ﷺ ne farmaya ke aye saad: ba-wajood ye ke ek shaks mujhe zyada azeez hai, kisi aur dusre ko is Khof ki wajah se maal de deta ho ke, Allah ise aag me daal de.
Sahih Bukhari 27
Hadees ki Tashreeh:
1. Momin aur musalman me fark.
- Momin wo hai jo dil se iman lata hai jiska Aqidah aur amaal dono durust hote hai.
- Musalman wo hai jo sirf zahiri taur par Islam ka izhar kare magar dil me iman mukammal ya mazbut na ho. Ye fark Qur'an majeed ki ayat se sabit hai.
Allah ﷻ ne farmaya: dihati log kehte hai ke hum iman laye, keh do. Ke tum iman nahi laye, balke yun kaho ke hum musalman huwe hai, aur abhi iman tumhare dilo me dakhil nahi huwa.
Surah hujurat 14
2. Atiya ka maqsad aur Hikmat.
Hadees se malum hota hai ke nabi ﷺ kabhi kabhi atiya un logo ko dete the jo iman me kamzor ya naye musalman hote, take unka iman mazbut ho aur wo Deen par sabit kadam rahen.
Allah ﷻ ne farmaya: aur unke dilo ko jod diya jaye. Surah tauba 60
Ye ayat ye batati hai ke zakaat aur sadqa un logo ko bhi diya ja sakta hai jo Islam ke kareeb ana chahte ho.
3. Fitna aur Deen se Firne ka khoff.
Nabi ﷺ ne farmaya: kabhi kabhi zyada aziz hone ke ba-wajood kisi shaks ko atiya nahi diya jata, kyu ke uski zarurat nahi hoti, aur dusro ko dena unki kamzori ke bais zyada zaroori hota hai. Take wo Deen se na firjaye.
Allah ﷻ ne farmaya: po as jahan tak tumhari istitaat ho Allah se Daro.
Surah tagabun 16
4. Qiyadat aur insaf ka usool.
Hadees hame qiyadat ke Aala usool bhi sikhati hai. Ke ek rehnuma ko apne faisle apni zati pasand na-pasand ki buniyad par nahi, balke ummat ke fayde aur hikmat ke liye karne chahiye.
Aham Nukat.
- Nabi ﷺ har shaks ki zahiri aur batini halat ko jante the, aur unki zarurat ke mutabik faise karte the.
- Kamzor iman walo ko Deen par Qayam rehne ke liye nabi ﷺ ne hikmat se faisle liye.
- Saad رضي الله أن ke pasandida shaks ko atiya na dena is baat ki dalil hai ke qiyadat zaati jazbati ke bajaye ijtimai Hikmat aur adal par honi chahiye.
- Qur'an aur hadees se ye wazeh hota hai ke haqiki iman aur zahiri iman me fark hota hai.
Note:
Qiyadat me adal aur hikmat zaruri hai. Sadqa aur atiya ki takseem me logo ki zarurat aur unke halaat ka lihaz rakhna chahiye. Zahiri iman kafi nahi dil ki gehraiyo se iman ko mazbut karne ki koshish karni chahiye.
Ye hadees Ummat ke andar adal, hikmat aur qiyadat ke usoolo ko Ujagar karti hai.