Bharat ke musalmano ki Halat ki Asal wajah Deen aur dunia mazhabi aur amal-e-dunia se doori se hai. Islam ek mukammal zindagi ka nizam deta hai jaise education, akhlaq, insaaf aur ekta.
Bharat ke musalmano ki halat kharab hone ki asal wajah wo khud hai. Kaise? Isko hum details me samajhne ki koshish karenge.
The article may be long but will be full of information.
Hum is mudde ko 4 buniyado ke zariye samjhenge jo asal wajah hai.
(1)Islam Se Door Hona.
Musalmano ki kamzori ka sabse bada sabab unka Islam ki asliyat se door hona hai. Qur'an-o-sunnat ka maqsad ek aisi zindagi ka nizam dena hai jo dunia aur Akhirat me kamyabi ki taraf le jaye, lekin jub musalman Deen aur uski taleem se door ho gaye to unki halat girti chali gayi.
Allah ï·» ne farmaya: aur jo mere zikr (ibadat) se muh modega hum uski zindagi tang kar denge aur Qayamat ke din usko andha uthaynge.
(Surah taha 124)
Matlab ye hai ke Deen se doori sirf runhani nahi balke dunia me bhi tangi aur kamzori ka sabab banti hai.
Musalman ummat ka farz tha ke wo logo ko nek kamo ki dawat de aur buraiyo se roke, lekin musalman is farz ko bhul gaye aur khud hi buraiyo me mulawwas ho gaye aur ummat kamzor ho gai.
Allah ï·» ne farmaya: aur tum mese ek aisi jamat honi chahiye jo nek kamo ki dawat de aur buraiyo se roke aur logo ko sachai ki taraf bulaye.
(Surah Al-imran 104)
Is ayat ke mutabik ummat ka ye lazmi kaam hai ke wo insaaf aur nek kamo ka paigam lekar chale, lekin ye kaam musalmano ne bohot pichhe chhod diya hai.
Nabi ï·º ne farmaya: jub tum mese burai dekhe wo apne hath se roke, hath se na kar sake to apni zuban se roke, agar iski bhi takat na ho to apne dil se bura jane. Aur ye iman ka sabse kamzor darja hai.
(Sahih Muslim 177/int 49)
Magar aaj ke musalman na to hath se burai ko rokte hai, na zuban se. Aur na dil se bura samajhte hai. Aur kuch musalman aise hai bhi jo rok sakte hai hath se ya zuban se. To unhone is hadees ka sabse akhir ka hissa pakad liya hai ke dil se bura samajh lete hai. Allah ki kasam agar tum zuban se bol sakte ho to Dil se bura samajhna tumhe jahannam me ghaseet kar le jayga. Agar tum hath se rokne ki takat rakhte ho aur sirf zuban se koshish karte ho to bhi tumhari zuban tumhe jahannam me ghaseet kar le jaygi.
Allah farmayga maine tujhe hath se rokne ki takat di thi, fir tune hath ke badle zuban se roka?
Allah farmayga maine tujhe zuban se rokne ki takat di thi fir tumne zuban ke badle dil se bura jana?
Jawab soch kar dekho. Jo tumhare dilo ke haal janta hai uske samne tumhari be-buniyad dalile nahi chalengi.
Ummat ki Ekta Ka tootna:
Firqa-wariyat, biradari aur zaati mafadat ki wajah se musalman ek dusre se door hote gaye, Islam ekta aur bhai-chare par mabni hai. Jub ekta aur bhai-chara hi nahi to Islam kahan hai? In jazbati ki kami ne musalmano ko kamzor kar diya.
Allah ï·» ne farmaya: aur sabhi milkar Allah ki rassi ko mazbuti se tham lo aur apas me foot mat dalo. (Surah Al-imran 103)
Lekin aaj musalman firqo me bate huwe hai jo inki ekta aur takat ko kamzor karta hai. Iski asal wajah Olema hai mai sabhi Olema ki bat nahi kar raha. Wo Olema jo musalmano ko musalmano ke khilaf hi bhadkate hai, wo Olema jo musalmano ke dilo me musalmano ke liye hi nafrat bharte hai. Kya unko is ayat ki pairvi karne ka haq nahi? Ya unka imaan hi nahi is ayat par? Ummat ka Allah ek hai, Qur'an ek hai, nabi ï·º ek hai, Qibla ek hi hai. Fir musalman alag kaise ho gaye?
Nabi ï·º ne farmaya: musalman musalman ka bhai hai na us par zulm karta hai na hone deta hai.
(Sahih Bukhari 2442)
Is hadees ko padh kar apne kaleje ko tatol kar dekhiye. Kya waqai Aap is hadees par amal karte hai? Aaj musalman musalman ki madad karne me bohot piche hai usko apna bhai hi nahi samajhta. To Ummat kamzor nahi hogi to kya hogi.
(2) Duniya Ke Mamlaat Mein Peeche Rehna.
Taleem aur rozgar ki ahmiyat ko Islam me ibadat ka darja diya hai. Jub musalman taleem aur rozgar me pichhe reh jaye, to ye unki kamzori aur ummat ke pichhdaw ka sabab Banta hai.
Islam me taleem ko farz karar diya gaya hai aur ye taleem sirf Deen tak simit nahi, balke dunia ke muamlat ko bhi shamil karti hai.
Allah ï·» ne farmaya: kya ho log ilm wale hai aur jo ilm nahi rakhte, kya dono barabar ho sakte hai.
(Surah zumar 9)
Is ayat me taleem aur ilm ki ahmiyat ko wazeh kiya gaya hai. Taleem sirf Deen ke masail ke liye nahi, balke dunia ke bhi har muamle me rehnuma banne ke liye hai.
Nabi ï·º ne farmaya: ilm ka hasil karna Har musalman mard aur aurat par farz hai.
(Ibn-e-majah 224)
Is hadees ke mutabik har musalman par farz hai ke wo taleem hasil kare. Farz ka matlab hota hai compulsory karna hi karna hai iske siwa koi option nahi. Kitne musalman hai jo taleem hasil karne ke liye apni ji jaan laga dete hai? Is taleem me Deen aur dunia dono taleem shamil hai. Take wo khud apni zindagi aur ummat ke liye mufeed ban sake.
Allah ne insan ko ilm aur aqal ke zariye tamam makhlukat me sabse afzal banaya.
Allah ï·» ne farmaya: aur Allah ne Adam alaihissalam ko saare naam sikha diye( ilm diya)
(Surah Al-Baqarah 31)
Ye ilm musalmano ki tarakki ka buniyadi zariya hai.
Musalman taleem me piche reh gaye hai jo unki duniavi kamyabi aur ummat ki tarakki ke liye rukawat hai.
Arthik Pichhdaav Aur Kasb-e-Rozgar:
Rozgar aur kasb-e-Rozgar ko Islam me ibadat ka darja hai. Har shaks par lazim hai ke wo apne aur apne ghar walo ki zarurat ko halal tarike se pura kare.
Allah ï·» ne farmaya: aur apne rozgar ki talash me zamin par fail jao.
(Surah mulk 15)
Is ayat me Allah ne musalmano ko halal rozgar ke liye zameen par chalne aur mehnat karne ka huqum diya hai.
Allah ï·» ne farmaya: aur admi ke liye wahi hai jo usne mehnat ki.
(Surah najam 39)
Is ayat se saaf pata chalta hai ke mehnat ka fal hi insan ki kamyabi ka sabab hai.
Nabi ï·º ne farmaya: kisi insan ne us shaks se behtar rozi nahi khai jo khud apne hatho se kama kar khata hai. Hazrat Dawood alaihis-salam bhi apne hatho se kama kar khate the.
(Sahih Bukhari 2072)
Ye hadees is baat ki taraf ishara karti hai ke mehnat aur rozgar insan ki zindagi ka Aiham hissa hai. Aur musalman ko mehnat karne se puche nahi hatna chahiye. Halal zariya-e-maash talash karna chahiye Allah usi me madad aur barkat deta hai.
Bharat ke musalmano ke liye madaris me talim ka aisa intizam hona chahiye ke wo chahe to madaris se Doctor, engineer, Scientist ya dunia ki jo bhi tr aleem use chahiye ho wo madaris me mil sake. Par kitne madaris hai aise?
musalman garibi ke shikar hai jiski wajah se wo apne bacho ko behtar taleem nahi de pate. Kyu? Kya kami hai bade bade idaro ke paas paiso ki? Itna paisa hai musalmano ke paas ke har hafte ek university bana kar khadi kar sake hai.
Ek dusre ko support karna chahiye jo ki nahi karte. Agar koi musalman tarakki ki rah par chal pade to sabse pehle usko musalman hi pakad kar niche girana chahta hai. Isko Islam nahi kehte aur na hi musalman aisa hota hai.
(3) Insaaf Aur Adal Ka Na Hona.
Islam insaf aur adal ka paigam dene wala mazhab hai. Qur'an aur hadees me insaf ko buniyadi khandan, muashre aur huqumat ki mazbuti ka zariya karar diya gaya hai.
Lekin jub insaf ka nizam toit jaye aur mazloomiyat badh Jaye, to muashra aur Qom kamzor ho jati hai.
Insaf ka nizam Qur'an ka Aiham huqum hai jo har shaks aur muashre par wajib hai.
Allah ï·» ne farmaya: aur tum logo ke beech insaf ke sath faisla karo.
(Surah nisa 58)
Ye ayat is baat ki taraf ishara karti hai ke insaf har shaks aur mushare ka farz hai, aur insaf ke bina muashre ka nizam toit jata hai.
Allah ï·» ne farmaya: aur logo ke sath insaaf karo beshak Allah insaf karne walo ko pasand karta hai.
(Surah hujurat 9)
Is ayat ke mutabik insaf karne wale log Allah ke nazdeek maqbool hai.
Allah ï·» ne farmaya: aur kisi Qom ki dushmani tumhe is baat par majbur na kare ke tum insaf na karo, insaaf karo' ye taqwe ke zyada kareeb hai.
(Surah ma'idah 8)
Is ayat me ye saaf farmaya gaya hai ke dushmani ke ba-wajood insaf ka daman nahi chhodna chahiye.
Zulm Ke Khilaf Ladne Ka Paigham:
Islam zulm ke khilaf ladne aur mazlumo ki madad ka huqum deta hai.
Nabi ï·º ne farmaya: insaf karne wale log Allah ke yahan noor ke mimbaro par honge.
(Sahih Muslim 4721/ int 1827)
Is hadees me insaf karne walo ki fazilat ka zikr hai aur ye puri ummat ke liye misaal hai.
Nabi ï·º ne farmaya: zulm se bacho kyu ke zulm Qayamat ke din dilo par chhane wali zulmate hongi.
Sahih Muslim 6576/ int 2578
Is hadees ke mutabik zulm karna ya zulm bardasht karna dono hi na qabile qabool hai.
Bharat ke musalmano ko aksar muashre aur Rajnaitic maidan me insaf nahi milta. Iska sabab sirf dusro ka zulm nahi, balke musalmano ka khud apne huqooq ke liye jagruk na hona bhi hai.
Musalmano ka Rajnaitic maidan me yogdan bohot Kam hai, jiski wajah se unki awaz kamzor padti hai.
Firqa-wariyat, mazlumoyat aur pichhdaw ki wajah se unki unki aartik aur samajik halat gir gai.
(4) Taqwa Aur Amal-e-Saleh Ka Afsoosnak Haal.
Taqwa aur Amaal-e-Saleh Islam ke buniyadi usool hai, jo musalmano ki zindagi ka maqsad aur behtreen ummat banne ka zariya hai.
Taqwe ka matlab hai Allah ka khoff aur har Amal me Allah ki Raza talash karna.
Jub musalman taqwa aur Amaal-e-Saleh me kamzor ho jate hai, to wo dunia aur Akhirat dono me nuksan uthate hai.
Allah ï·» ne farmaya: agar tum taqwa ikhtiyar karoge to Allah tumhare kaam asan kar dega.
(Surah talaq 4)
Is ayat me Wazeh hota hai ke taqwa hasil karne se Allah ki madad hasil hoti hai. Aur kaam asan ho jate hai khwah wo kitne hi mushkil kyu na ho.
Allah ï·» ne farmaya: Allah sirf unhi logo ke amaal qubul karta hai jo taqwa ikhtiyar karte hai.
(Surah ma'idah 27)
Yani taqwe ke bina koi bhi amal Maqbool nahi hota, matlab ye hai ke taqwa ibadat ki asli rooh hai.
Allah ï·» ne farmaya: jo Allah ka taqwa ikhtiyar karega Allah uski mushkile asan kar dega aur usko aisi jagah se rizk dega jiska usko guman bhi na hoga.
(Surah talaq 2-3)
Yani taqwe ke bina musalman apni qamyabi hasil kar hi nahi sakte. Aur na hi Allah unki madad karega. Jo Allah ka taqwa nahi rakhte.
Taqwa rakhne wale ko har waqt ye baad zehnashin rahti hai ke Allah use dekh raha hai. Har gunah se bachne ki koshish karta hai fir chahe wo chhota ho ya bada. Sach har halat me bolta hai. Zina ke kareeb bhi nahi jata, aur buri bato se parhez karta hai. Musalmano se muhabbat karta hai. Har waqt musalman bhai ki madad ke liye tyar rehta hai. Apne padosiyo ko kabhi taklif nahi deta. Kabhi gali nahi deta. Abhi kisi haq nahi marta. Aur haya ko apni izzat samajhta hai. Kisi gair mehram ki tarah nigah nahi uthata. Ibadat khushu aur Khuzu ke sath karta hai. Maa-baap ke samne kabhi unchi awaz nahi nikalta, maa-baap ka khidmat guzar hota hai. Rishtedaro, garibo miskino ke sath husn-e-sulook sulook karta hai.
Yahi momin hota hai. Aur yahi wo log hote hai. Jinke sath Allah hota hai.
Allah ï·» ne farmaya: aur dil chhota na karo, na hi udas ho, tumhi galib rahoge agar tum momin rahoge.
(Surah Al-imran 139)
Ab bataye kya musalman galib hai? Nahi agar momin hote to galib hote. Qur'an Jhuta ho nahi sakta. Kami musalman me hi hai. Allah ne to farma diya hai tumhi galib rahoge agar tum momin rahoge. To sabse pehle momin bano. Uske baad Allah se madad Talab karo. Allah ki kasam tumhare liye farishte nazil kardega. Allah wo Rub hai.
Agar musalman chahta hai ke Allah unki madad kare. To usko Apne aap ko badalna hoga. Warna bhool jao.