Harqal (shah-e-rom) ne unke paas quraish ke qaafle me se ek admi ko bulane ko bheja. Us waqt ye log tijarat ke liye shaam ja rahe the.
Aur ye wo zamana tha jab nabi ﷺ ne Abu sufiyan ke sath ek ahad kiya hua tha, jab Abu sufiyan aur dusre log harqal ke paas bait-ul-muqaddas pohche, jahan harqal ne darbaar lagaya hua tha, aur uske darbaar me bade bade log jaise ulema, wuzara aur umara baithe hue the. Harqal ne unko aur uske tarjuman ko bulaya.
Fir harqal ne pucha:
Tum me se kon shaks mad'ai risalat yani Nabi ﷺ ka zyada karibi rishtedar hai?
Abu sufiyan kahte hai ke me bol utha ke main unka zyada karibi rishtedar hun.
Fir harqal ne huqum diya ke isko yani Abu sufiyan ko mere zyada kareeb lakar bitha do.
Fir apne tarjuman se kaha ke iske sathiyo se keh do ke main Abu sufiyan se us shaks (nabi ﷺ) ke bare me sawal karunga. Agar ye mujhse jhut bole to tum log piche se iska jhut mujhse Zahir kar dena.
Abu sufiyan kehte hai ke Allah ki Kasam agar mujhe is baat ki sharm nahi hoti ke ye log mujhe jhutlaynge to me zarur Nabi ﷺ ke mutallik galat baat keh deta.
Fir sabse pehla sawal ko harqal ne kiya wo ye tha.
1. Us shaks (nabi ﷺ) ka khandan tum logo me kaisa hai?
Maine kaha: wo to bade unche aur aala nasab Waale hain.
2. Harqal ne kaha: isse pehle bhi tum logo me kisi ne aisi baat ki thi?
Maine kaha: nahi.
3. Harqal ne kaha: acha uske bado me pehle kabhi koi badshah hua hai?
Maine kaha: nahi.
4. Harqal ne kaha: bade log iski pairvi karte hai ya kamzor log?
Maine kaha: kamzor log.
5. Harqal ne kaha: uske tabedaar har roz badhte ja rahe hai, ya koi usko chhod kar bhi jata hai?
Maine kaha: uske tabedaar badhte ja rahe hai, koi usko chhod kar nahi jata.
6. Harqal ne kaha: kya usne isse pehle yani nabuwat ke dawe se pehle kabhi jhut bola?
Maine kaha: nahi. Aur ab hamari usse ek mukarrar muddat ke liye sulah hui hai, maloom nahi wo isme kya karne wala hai.
Abu sufiyan kehte hai me is baat ke siwa aur koi jhoot is guftgu me shamil na kar saka.
7. Harqal ne pucha: kya tumhari uske sath kabhi ladai Hui hai?
Maine kaha: haan.
8. Harqal ne pucha: fir tumhari aur uski jung ka kya haal hota hai?
Maine kaha: kabhi wo humse Jeet jate hai, kabhi hum unse Jeet jate hai.
9. Harqal ne pucha: wo tumhe kis baat ka huqum deta hai?
Maine kaha: wo kehte hai ke sirf ek Allah ki ibadat Karo, uska kisi ko Shareek na banao, aur apne baap dada ke Deen ko chhod do, aur hamesha namaz padhne, sach bolne, parhezgari, aur silarahmi ka huqum dete hai.
Fir harqal ne apne tarjuman se kaha, Abu sufiyan se kehdo ke maine tumse uska nasab pucha to tumne kaha wo uche nasab wale hai.
Aur paigambar apni qaum me hamesha unche nasab wale hi bheje jate hai.
Maine tumse pucha ke is baat ko kya tumhare andar isse pehle bhi kisi ne kaha? To tumne kaha nahi.
Tab maine socha ke agar is baat ko paile bhi kisi ne kaha hota to me samajhta ye shaks bhi wahi baat keh raha hai jo pehle bhi kahi ja chuki hai.
Maine tumse pucha uske bado me koi badshah hua hai? To tumne kaha nahi.
To maine socha ke agar iske bado me koi badshah hota to me tumse kehta ke ye apne baap dada ki badshahat hasil karna chahta hai.
Maine tumse pucha ke kya isse pehle kabhi usne jhoot bola hai? To tumne kaha nahi.
To mai samajh gaya wo shaks insano ke bare me jhoot se bachta hai, to Allah ke bare me jhoot kaise bol sakta hai.
Maine tumse pucha ke bade log iski pairvi karte hai ya kamzor log? To tumne kaha kamzor log pairvi karte hai.
Aur wahi log paigambaro ke mutabi hote hai.
Maine tumse pucha ke uske tabedaar badh rahe hai ya kam ho rahe hai? To tumne kaha badh rahe hai.
Aur yahi imaan ki haqikat hai, ke jab tak wo mukammal na ho jaye wo badhta hi rahega.
Maine tumse pucha uske tabedaar uske Deen se naraz hokar murtad bhi hote hai? To tumne kaha nahi.
To ye imaan ki khasiyat hai ke jiske bhi dilo me iska suroor bas jaye, wo isse kabhi nahi firte.
Maine tumse pucha ke kya wo ahad shikni karta hai? To tumne kaha nahi.
Paigambaro ka yahi haal hota hai ke wo ahad ke khilaaf kabhi nahi jate.
Maine tumse pucha ke wo tumhe kis chiz ka Huqm deta hai? To tumne kaha ke wo Allah ki ibadat ka Huqm deta hai, aur Allah ke sath kisi ko Shareek na karne , buto ko pujne se rokne, sach bolne aur parhezgari ka Huqm deta hai.
Lihaaz agar ye bate jo tum keh rahi ho sach hai, to ankareeb wo is jagah ka maalik ho jayga jahan is waqt mere ye dono kadam hai. Mujhe maloom tha ke ek Pagambar aane wale hai, lekin ye maloom nahi tha ke wo tum mese honge. agar mujhe ye maloom hota ke me unse mil sakta hu to me unse milne ke liye har takleef ko bardasht kar leta. Agar me unke paas hota to Mai unke paun dhota.
Iske baad harqal ne nabi ﷺ ka wo khat mangwaya jo Nabi ﷺ ne dihyah kalbi رضي الله أن وردة ke zariye hakam e Basra ke paas bheja tha, aur usne wo khat harqal ke paas bhej diya tha. Fir us khat ko padha gaya, aur unse likha tha:
Shuru Allah ke naam ke saath jo nihayat meharbaan aur reham karne wala hai. Allah ke bande aur uske paigambar mohammad ﷺ ki taraf se ye khat shah-e-rom ke liye hai, us shaks par salaam ho jo hidayat ki pairvi kare. Iske baad me aapke samne dawat-e-islaam pesh karta hun. Agar aap Islam le aynge to Aap ko Deen aur dunia me salamati naseeb hogi, Allah apko dogra ajar dega, agar aap meri dawat se ruhgardani karenge, to apki riahya ka gunah bhi aap par hi hoga, aur ahl-e-kitaab ek aisi baat par aa jao jo hamare aur tumhare darmiyan mushtarik hai, wo ye hai ke hum Allah ke siwa kisi ki ibadat na karen, aur kisi ko Allah ka Shareek na thehrayen, aur na hum me se koi kisi ko Allah ke siwa apna rub banaye, fir agar wo ahl-e-kitaab is baat se muh fer len, to musalmano tum unse keh do ke tum maano ya na maano hum to Ek Allah ke hi itaat guzaar hai.
Abu sufiyan kehte hai.
Jab harqal ne jo kuch kehna tha keh diya aur khat padh kar farig ho gaya, to uske Darbar me bohot shor hone laga, bohot si awaze uthne lagi aur hame bahar nikaal diya gaya. Tab maine apne sathiyo se kaha Abu kabsha ke bete, nabi ﷺ ka mamla to bohot badh gaya hai, dekho isse bani asfar rom ka badshah bhi darta hai.
Abu sufiyan kehte hai ke mujhe us waqt is baat ka yaqeen ho gaya tha ke nabi ﷺ gaalib ho kar rahenge, hatta ke Allah ne mujhe musalman kar diya.
Ibne nator jo ilia ka hakim aur harqal ka musahib tha aur shaam ke nasara ka laat paadri tha, bayan karta hai.
Harqal jab ilia aya to ek din subah ke waqt pareshan tha, uske darbariyo ne usse pucha ke aaj apki halat badli hui hai, kya wajah hai?
Ibne nator bayan karta hai ke harqal najumi tha aur ilm-e-najum me mahir tha, usne apne hum nashino ko bataya, maine aaj rat sitaro par nazar daali, to dekha ke khatna karne walo ka badshah hamare mulk par gaalib aa gaya hai, bhala is zamane me kaun log khatm karte hai?
Unhone kaha:
Yahoodi ke siwa koi khatna nahi karta hai. So inki wajah se pareshan na ho aap, saltanat ke tamaam shahro me ye hukm likh bhejiye ke jitne bhi yahoodi ho sab qatl kar diye jaayen.
Wo log inhi baato me mashgul the ke harqal ke paas ek shaks ko laya gaya, jise shah-e-gassaan ne bheja tha, usne nabi ﷺ ke haal bayan kiye, jub harqal ne sab suna to kaha.
Jao dekho wo khatna kiye hue hai ya nahi.
Unhone dekha to bataya ke wo log khata kiye hue hai, tab harqal ne kaha.
Yani mohammad ﷺ is ummat ke badshah hai jo paida ho chuke hai.
Fir harqal ne apne dost ko roomiya khat likha, jo ilm-e-najum me harqal ki tarah mahir tha, fir wahan se harqal rom chala gaya.
Harqal ne rom ke bade admiyon ko apne mehal me talab kiya aur uske Huqm se mehal ke sab darwaze band kar diye gaye. Fir wo apne khaas mehal se bahar aya aur kaha.
Aye rom ke logo kya hidayat aur kamyabi me kuch hissa tumhare liye bhi hai? Agar tum apni saltanat ki baqa chahte ho, to is nabi ﷺ ki bait karlo, aur musalman ho jao.
Itna sunte hi wo log jaise diwane gadho ki tarah mehal ki taraf bhage magar unhe darwaze band mile. Jub harqal ne dekha ke ye log imaan nahi laynge ye log imaan se nafrat karte hai to harqal mayoos ho gaya. To kaha:
In logo ko mere paas le ao
Jab wo log fir se aye to harqal ne kaha:
Maine Jo bat tum logo se ki thi wo tumhare deen par tum kitne pakke ho ye imtihaan lene ke liye ki thi, so wo Maine dekh liya.
Iske baad wo sabhi log harqal ke samne sajde me gir pade aur sab khush ho gaye, harqal ki akhri halat yahi thi.
Abu Abdullah kehte hai ke Is hadees ko Saleh bin kaisan, yunus aur ma'mar ne bhi zohri se bayan ki hai.
Sahih Bukhari hadees no 7
Chaliye ab hum is taweel hadees ko thoda samajhne ki koshish karte hai.
1. Harqal ka irada.
Harqal ek ahl-e-kitaab tha wo apne ilm ke zariye nabi ﷺ ke bare me sachai janna chahta tha. Jo nishaniya uske Deen ki kitabo ( injeel aur taurat ) me likhi hui thi, un nishaniyo ko wo nabi ﷺ ke sath jod kar dekhna chahta tha.
2. Abu sufiyan ab tak musalman nahi hue the wo quraish ki mukhalifatt karte the, iske ba-wajood Abu sufiyan ne nabi ﷺ ke bare harqal ko sach bataya, kyu ke harqal ne Abu sufiyan ke sathiyo ko unki peeth piche bitha kar unke jawabo ka gawah bana diya tha.
3. Tarjuman (translator)
Harqal ke paas tarjuman ka hona is bat ki dalil hai ke wo nabi ﷺ ke bare me har lafz ko samajhne aur uska mutala karne me ahmiyat de raha tha.
4. Darbaar me Bade log.
Harqal ne apne darbaar me ulema, wuzara aur umara ko bhi bulaya tha, ye is baat ka matlab hai ke harqal apni zaati ray nahi bana raha tha, darbaar me wo log baithe the jo in nishaniyo ke bare me unke Deen ki kitabo me padh chuke the. Harqal apne ilm ka izhar un sabhi ke samne kar raha tha.
Harqal ke sawal, aur Abu sufiyan ke jawab.
1. Harqal ne pucha unka khadan kaisa hai?
Abu sufiyan ne kaha: wo unche aur aala nasab wale hai.
- iska matlab hai ke nabi ﷺ ka quraish kabile ke sabse izzatdar khandan banu Hashim se hona unki nabuwat ki dalil hai,
Allah ﷻ ne farmaya: Allah ne Adam, nuh, ibrahim ke gharane aur imran ke gharane ko puri dunia me upar chuna.
Surah al-imran 33
2. Isse pehle tum logo me kisi ne aisi bat kahi?
Abu sufiyan ne kaha: nahi.
Nabi ﷺ ki nabuwat se pehle kisi ne bhi quraish me ye dawa nahi kiya tha, quran is baat ki tasdeeq karta hai ke nabi ﷺ wahi paigam lekar aye hai jo Allah ﷻ ki taraf se hai.
Quran me Allah ne farmaya: Aap ﷺ nahi jante the ke kitab kya hai aur imaan kya hai.
Surah ash-shu'rah 52
3. Uske baap dada me kabhi koi badshah tha?
Abu sufiyan ne kaha: nahi.
Nabi ﷺ ka kisi siyasi ya badshahi silsile se talluk na hona bhi nabuwat ki dalil hai, kyu ke nabi ﷺ ki risalat sirf Allah ka diya hua martaba hai,
Quran me Allah ﷻ ne farmaya: Mai tumhare upar kisi duniavi daulat ya badshahat ka dawa nahi karta.
Surah hud 88
4. Bade log uski pairvi karte hai ya kamzor?
Abu sufiyan ne kaha: kamzor.
Ambiya ka paigam sabse pehle kamzor aur maaloom tabko me kabool hota hai, ye is baat ki dalil hai ke Islam insaaf aur barabari ka Deen hai.
Allah ne farmaya: humne jab bhi kisi basti me paigambar bheja to wahan ke aishparast log unka inkar karte.
Surah Saba 34
5. Unke tabedaar har roz badhte ja rahe hai ya koi unko chhod kar bhi jata hai?
Abu sufiyan ne kaha: unke tabedaar badhte ja rahe hai koi chhodkar nahi jata.
Islam ki roohani takat aur nabi ﷺ ki shaksiyat ka asar itna hai ke unka har manne wale Deen ke mamle me mazboot hota chala gaya.
Allah farmata hai: humne is quran ko nazil Kiya aur hum hi iski hifazat karenge.
Surah Al-hijr 9
6. Kya unhone nabuwat se pehle kabhi jhoot bola?
Abu sufiyan ne kaha: nahi.
Nabi ﷺ ko nabuwat se pehle hi log al-ameen yani amanatdaar aur as-sadik ( sach bolne wala) ka lakab dekar bulate the, aur nabuwat ke baad.
Quran me bhi Allah ne farmaya: aur AAP Azeem Akhlaaq wale hai.
Surah al-qalam 4
7. Tumhari uske sath kabhi ladai Hui?
Abu sufiyan ne kaha: Han kabhi wo hamse Jeet jate hai, kabhi hum unse Jeet jate hai.
Nabi ﷺ ki har Jung Allah ﷻ ke Deen ko sar buland karne ke liye thi, Har Jeet aur haar Allah ki maslihat aur himmat ka hissa hoti hai.
Allah farmata hai: Agar tum Allah ki madad karoge to Allah tumhari madad karega aur tumhare kadam mazboot karega.
Surah Muhammad 7
Is ayat me Allah ki madad se Murad hai Allah ke Deen ko dunia Me galib karne ki koshish karna.
8. Wo tumhe kis baat ka Huqm dete hai?
Abu sufiyan ne kaha: wo kehte hai sirf Allah ki ibadat Karo, uske sath kisi ko Shareek na therao, aur apne baap dada ke Deen ko chhod do, namaz padhne , sach bolne, parhezgari aur silarahmi ka hukm dete hai.
Ye nabi ﷺ ke paigam ka chhota sa hissa hai.
Quran me Allah ne farmaya: sirf Allah ki ibadat Karo, uske sath kisi ko Shareek na banao.
Surah nisa 36
Namaz aur sach.
Allah farmata hai: Namaz behayai aur burai se rokti hai.
Surah ankabat 45
Silarahmi.
Allah farmata hai: aur kareebi rishtedaro ka haq ada karo.
Surah Al-Israeel 26
Is ayat me rishtedaro ka haq se Murad ye hai ke Aap ka talluk unke sath mohabbat aur khuloos ka ho, wo kaise hai ye mayne nahi rakhta, Allah ka farman mayne rakhta hai.
Harqal ne jo kuch bhi Abu sufiyan se pucha aur Abu sufiyan ke jawab sunne ke bad usne jo kaha agar ye bate jo tumne jawab me batai sach hai to bohot jaldi nabi ﷺ is sarzameen ke malik ban jaynge jahan is waqt me hun, usne kaha agar wo nabi ﷺ se mil sakta to nabi ﷺ ke pao dhokar unki izzat karega.
Ye baat Islam aur nabi ﷺ ki risalat ki ek dalil hai.
Nabi ﷺ ka khat:
Harqal ne dihyah al-kalbi رضي الله عنه ke zariye beje gaye nabi ﷺ ke khat ko mangwaya jo hakim-e-bushra ke zariye us tak pohcha tha.
Khat me likha tha.
Shuru Allah ke naam se jo nihayat meharbaan aur reham karne wala hai, mohammad ﷺ aur Allah ke bande aur uske rasool ki taraf se ye khat shah-e-rom ke liye hai, us shaks par salamati ho jo hidayat ki pairvi kare Iske baad me aapke samne dawat-e-islaam pesh karta hun. Agar aap Islam le aynge to Aap ko Deen aur dunia me salamati naseeb hogi, Allah apko dogra ajar dega, agar aap meri dawat se ruhgardani karenge, to apki riahya ka gunah bhi aap par hi hoga, aur ahl-e-kitaab ek aisi baat par aa jao jo hamare aur tumhare darmiyan mushtarik hai, wo ye hai ke hum Allah ke siwa kisi ki ibadat na karen, aur kisi ko Allah ka Shareek na thehrayen, aur na hum me se koi kisi ko Allah ke siwa apna rub banaye, fir agar wo ahl-e-kitaab is baat se muh fer len, to musalmano tum unse keh do ke tum maano ya na maano hum to Ek Allah ke hi itaat guzaar hai.
Sahih Bukhari 2941
1. Khat ne nabi ﷺ ne harqal ko likha agar tumne Islam ko na mana to tumhare gunah tumhare hi sar rahenge unhe Allah maaf nahi karega.
Jaisa ke quran me Allah farmata hai: koi bhi bojh uthane wala kisi aur ka bojh nahi uthayga.
Surah al-an'am 164
2. Khat me Allah ki ibadat ka paigam tha, aur monotheism aur shirk se baaz ane ko likha gaya tha, aur likha tha ke jo apki kitab aur hamari kitab me likha hai usko mano. Shirk se bachne aur khaalis Allah ki ibadat karne ke bare me unki kitabo me bhi likha hua tha.
Jaisa ke Allah ne farmaya: Kaho ahl-e-kitaab ek aisi baat ki taraf aao jo hamare aur tumhare darmiyan barabar hai, ke hum Allah ke siwa kisi ki ibadat na kare.
Surah al-imran 64
Harqal ke upar khat ka asar:
Harqal ne nabi ﷺ ki sachai ko kubul kar liya tha. Lekin harqal ek badshah bhi tha.
To iske bare me hum age aur details me batate hai.
Aur Abu sufiyan ab tak musalman nahi hue the, lekin is waqiye ke baad unko samajh aa gaya ke nabi ﷺ ko Allah ne bada zabardast bana diya hai, aur wo bohot jaldi sab par galib ho jaynge, aur Allah ne Abu sufiyan ko hidayat de di.
Ye Allah ki hidayat ka nizam hai.
Quran me Allah ne farmaya: tum jise chaho hidayat nahi de sakte, magar Allah jise chahta hai usko hidayat de deta hai.
Surah al-qasas 56.
Harqal ka Rad-e-amal.
Harqal ne Apne mehal me jakar, darwaze band karke, fir ek khaas jagah se bahar nikal kar rom ke logo ko Islam ki dawat di thi, harqal ne kaha tha: aye rom ke logo kya hidayat aur kamyabi me tumhare liye bhi koi hissa hai? Agar tum apni saltanat ko bachana chahte ho to nabi ﷺ ki bait karlo aur musalman ho jao.
Harqal Islam qubul karna chahta tha, lekin wo chahta tha ke uski badshahat bhi baki rahe is liye badshahat ko baki rakhne ke liye uski qaum ka Islam ko qubul karna zaruri laga usko,
Quran me Allah ﷻ ne farmaya: ahl-e-kitaab ek aisi baat ki taraf aao jo hamare aur tumhare darmiyan ek jaisi hai. Ke hum sirf Allah ki ibadat kare aur uske sath kisi ko Shareek na thehrayen.
Surah al-imran 64
Harqal ki qaum ka rad karna.
Harqal ki baat sunte hi harqal ki qaum gusse me aa kar zor zor se shor macha kar Islam ke khilaaf apna gussa Zahir karne lage, aur Darbar se nikal kar mehal se bahar jane ki koshish karne lage lekin darwaze band mile.
Allah farmata hai: aur inhone dunia ki zindagi ko akhirat par tarji di.
Surah ibrahim 3
Harqal apni qaum se mayoos ho gaya.
Harqal samajh gaya ke ye log iman nahi laynge, ye to Islam ka inkaar kar rahe hai, ye dekh kar harqal ne un logo ko fir se bulaya aur fir kaha: maine jo baat tumse kahi thi wo sirf tumhare deen par tumhara imtihaan lene ke liye ki thi.
Harqal apne Jazbaat ko Zahir na kar saka aur uski hukumat aur qaum ke age jhuk gaya, usko ye dar tha ke agar me apne Jazbaat Zahir kar dunga to kahi uski badshahat khatre me na padh jaye aur ye qaum uske khilaf na ho jaye.
Allah ne farmaya: tum un logo ko paoge jo dunia ki zindagi ke liye imaan ka Sauda karte hai.
Surah Al-Baqarah 86
Jab harqal ne apni qaum se kaha ke me sirf tumhara imtihaan le raha tha, to ye baad sun kar uski qaum ne sukoon mehsoos kiya aur sab uske samne sajde me gir gaye, harqal ne apni saltanat aur apne qaum ko kayam rakhne ke liye Islam ko qubul nahi kiya, lekin uske dil ki halat uski baato se saaf Zahir ho rahi thi ke wo chahta to tha Islam qubul karna, lekin usne dunia ko Allah ke Deen par tarji di.
Qur'an Allah farmata hai: unke dil to Maan chuke hai magar unki zuban inkaar karti hai.
Surah namal 14.
Note:
Is hadees se hame bohot sari nasihate milti hai, Jin par amal karna chahiye.
1.Musalmano ko hamesha sach aur amanadari ka daman thame rahna chahiye. Jaisa ke nabi ﷺ ki fitrat me tha. Aur Allah bhi aise logo ko dunia ke logo ke dilo me izzat bakhshta hai.
2. Insaan sache dil se imaan par yaqeen rakhta hai uska dil Deen ki mohabbat se bhar jata hai, aur wo kabhi Deen se door nahi hota, hame bhi apne imaan ko mazboot rakhna chahiye, har condition aur har haal me Deen par amal karna chahiye.
3. Hamesha kamzor aur mazlumo ki madad karni chahiye, sachai me unka sath dena chahiye, kyu ke Allah ke nazdeek mazloom aur kamzor log zyada pasandida hote hai.
4. Hame bhi apni zindagi Deen ke ahkamo ke mutabik jini chahiye, Allah ki ibadat, shirk aur biddat se doori, sach bolna aur rishtedaro ke sath husn-e-sulook karna chahiye.
5. Hame Allah ke pagaim ko logo tak pohchane ki koshish karni chahiye, hikmat aur mohabbat ke sath, take log asaani se use qubool kar sake.
6. Hamesha Allah ki madad par yaqeen rakhen, aur Deen ke kaamo me shamil hokar uska hissa banne ki koshish Kiya kare.
7. Apne Akhlaaq ko aisa banana chahiye, jisse log hamare akhlaq dekh kar Allah ke Deen se mutassir ho, aur Deen apke akhlaq se Zahir hota ho.
8. Hame ye yaqeen rakhna chahiye ke islaam ek haq ka Deen hai, aur ye Qayamat tak apne Noor ko puri dunia me failata rahega. Hame apni koshish isi Noor ko failane me karni chahiye.
9. Nabi ﷺ ki mohabbat hameshaa apne dil me rakhni chaiye, aur aap ﷺ ki sunnat apni amal me rakhni chahiye.
Ye hadees sirf ek waqia nahi hai, balke hame hamari zindagi, Deen aur hamare imaan ke bare me bohot saari nasihaten sikha rahi hai.
Allah ﷻ apni rahmat se hum sabko Allah ke khalis Deen par amal karne ki taufiq ata farmaye. Ameen.